Harry Potter en asturianu

La saga de Harry Potter ye una serie de noveles de fantasía escrites pola británica J. K. Rowling (alcuñu de Joanne Rowling, enxertando la inicial del nome de la güela "Kathleen"). Los llibros presenten un mundu máxicu enllenu bruxes y magos, y el protagonista ye'l magu Harry Potter, un rapacín. Dende la publicación de la primera novela, Harry Potter and the Philosopher's Stone (Harry Potter y la Piedra Filosofal) en 1997, los llibros ganaron una popularidá pergrande y un gran éxitu comercial per tol mundu, produciendo películes, videoxuegos, y un fargatáu d'otros artículos. Los seis primeros llibros tienen vendío más de 325 millones de copies en total y traduciéronlos a 64 llingües, incluyendo l'asturianu.

La historia entama'l 31 d'ochobre de 1981, Voldemort descubre l'abellugu de Lily y James Potter, y mátalos, pero de la qu'intenta matar al naciellu, la maldición rebota, convirtiéndolu nun espíritu ente la vida y la muerte, y dexando una marca na frente de Harry Potter. Al ser la única persona que sobrevive la maldición mortal de Voldemor, conviértese nuna llienda "El neñu que sobrevivió" ente los magos.

La serie sigue la tradición británica de lliteratura pa neños, lo más de la historia trescurre nel Colexu Hogwarts de Maxa y Fechicería, onde los escolinos tán internos, cuéntanos la llucha de Harry Potter en contra de Lord Voldemort y la so grei. Los llibros exploren l'amistá, l'ambición, l'amor, la reacción énte la muerte, etc. El mundu máxicu de Harry Potter constitúise nuna sociedá paralela al mundu real, cola so historia, habitantes y cultura (con dél oldéu al universu tolkianu).

Yá se publicaron los siete llibros de la serie (d'acorde cola autora), zarrando la serie Harry Potter y les relíquies mortales nel 2007 n'inglés (2008 en castellanu).

Los cinco primeros llibros adaptáronse en películes producíes pola Warner Bros, la cabera estrenóse nel añu 2007. La grabación de la siguiente entamó en setiembre de 2007, y la estrena va ser pal 21 payares de 2008.

Les versiones n'inglés de los llibros publíquenles Bloomsbury (n'Inglaterra) y Scholastic Press (nos Estaos Xuníos d'América), mentanto que de les ediciones en castellanu encárgase la editorial Salamandra. Ta pa salir a finales del añu 2008 la primer aventura de Harry Potter en llingua asturiana, que va correr al cargu d'Ediciones Trabe